Rewharewha - Tiakina koutou ko tō whānau - NIP8924
Information in te reo Māori for those aged 65+ years about getting a free flu vaccination.
Printed copies can be ordered from the National Immunisation Programme Bluestar portal https://portal.bluestar.co.nz/login/moh_vaccine
The full resource:
Tiakina koutou ko tō whānau
Mēnā he 65+ tō pakeke, me whiwhi i tō rongoā āraimate rewharewha KOREUTU
Ka pakeke haere ana koe, ka ngoikore haere tō pūnaha awhikiri. Ko te tikanga o tēnei ka nui ake te tūpono pāngia e te rewharewha me ngā mate āpiti pēnei i te pūkahu kakā me te uru ki te hōhipera, ahakoa e ora pai ana koe.
Ko te whiwhi i te rongoā āraimate rewharewha te ārai pai rawa atu i te pānga, i te horapatanga rānei i te rewharewha. Hei whakakaha i tō awhikiri, me whiwhi tō rongoā āraimate rewharewha ina wātea mai ki a koe.
He aha te rewharewha?
Ehara te rewharewha i te mate maremare noa. He mate kino, ā, ka tino māuiui te tangata. Mēnā he mate kino, ka uru pea ki te hōhipera - inarā mēnā he 65+ tō pakeke, he mate tauroa rānei tāu, pēnei i te mate manawa, te mate huka rānei.
I ētahi wā ka mate te tangata.
Me pēhea taku tiaki i ahau anō i te mate rewharewha?
Ko te whiwhi i te rongoā āraimate i ia tau te huarahi pai rawa atu hei tiaki i a koutou ko tō whānau, ka mutu he KOREUTU mēnā he 65+ tō pakeke. Ka rerekē te rongoā āraimate rewharewha i ia tau hei ārai i a koe i ngā momo rewharewha ka horapa whānui. Ahakoa kua whiwhi koe i te rongoā āraimate, ehara i te mea ka kore koe e pāngia e te mate rewharewha, engari ka whakaiti i te tūpono pāngia e te mate kino. E kore te mate rewharewha e pā ki a koe nā te rongoā āraimate - kāore he huaketo rewharewha ora o te rongoā āraimate e whakamahia ana i Aotearoa.
He aha ngā pānga kino ka pā mai pea ki a au i muri i te whiwhi rongoā āraimate rewharewha?
Ki te pā ngā pānga kino ki a koe i muri i te whiwhi rongoā āraimate rewharewha, he tohu tērā o te pai o te mahi o te pūnaha awhikiri o tō tinana. I muri i tō whiwhi awhikiri ka mamae pea koe, ka māngeongeo, ka pūwherowhero i te wāhi o te werohanga, ka hīwiniwini, ka kirikā, ka māuiui, ka ngenge hoki pea. I te nuinga o te wā kāore e roa ka mutu ngā pānga kino.
Ka taea e au taku rongoā āraimate rewharewha te whiwhi i te wā e whiwhi ana i ētahi atu rongoā āraimate?
Āe, ka taea. He pai te whiwhi tahi i te rongoā āraimate me ētahi atu rongoā āraimate, tae atu ki te rongoā āraimate Kowheori-19, shingles rānei. Mā te whiwhi tonu i ō rongoā āraimate e pai ake ai tō parenga i te mate.
Ki hea whiwhi ai au i taku rongoā āraimate rewharewha KOREUTU?
Kāore he utu o te rongoā āraimate rewharewha mā te hunga 65+ tau te pakeke, me te maha atu anō. Ka taea tō rongoā āraimate rewharewha te whiwhi i tō kaiwhakarato hauora. Kei te tuku hoki ētahi kēmehi maha i te rongoā āraimate rewharewha.
Hei tāpui i tō rongoā āraimate haere ki BookMyVaccine.nz, me waea rānei ki te Vaccination Healthline ki 0800 28 29 26.
Mō ētahi atu kōrero mō te whiwhi rongoā āraimate rewharewha
- me kōrero ki tō rata, nēhi, kaiwhakarato hauora rānei
- waea atu ki Healthline ki 0800 611 116
- haere ki info.health.nz/flu