Sivi-tokamu‘a ki he Kanisā Kau‘itaungafanau: Ko e talanoa ke tokoni atu ke fai ha‘o fili - Tongan HE1357

Ko e ui ki he kakai fefine Pasifiki

Turou, Cook Islands
Tulou, Fiji
Mautauninga, Kiribati
Tulou, Niue
Turo’, Rotuma
Tulou, Samoa
Tulou, Tokelau
Tulou, Tuvalu
Tulou, Tonga

‘I he loto faka‘apa‘apa mo‘oni
Tuku mu‘a ke mau fofola e falá
Ka tau alea ki he mo‘ui lelei ‘a e
‘Atamai
Sino mo e
Laumālie.

‘I he funga ‘o ‘emau ‘ofá
‘Oku mau talitali ‘a e
Kakai fefine Pasifiki kotoa pe ‘o
Moana-nui-a-Kiwa
‘Aki ‘emau ‘ofa.

Hiliō ai ‘emau lotohounga‘ia
Ke fakaafe‘i koe
Ke tau kaungā fetakinima
He lelei ‘o e
Talanoa toputapu ni.

Kātaki ‘o fakatokanga‘i ange: ‘I hono tufaki atu ‘o e ngaahi fakamatalá ni ke tokonia ‘a ha‘a fafine mo hotau ngaahi fāmilí, ‘oku mau lave‘i ‘oku ‘oatu ai ha ngaahi lea mo ha fokotu‘u fakakaukau fo‘ou ‘o ngali fakamatatu‘a, ka ‘oku mau tui ‘oku matu‘aki mahu‘inga ke tau ngāue‘aki ha lea ‘oku tonu mo mahinongofua he ko e kaveinga ‘oku pelepelengesi mo mafatukituki.

Ko ia ai ‘oku ‘oatu ‘a ‘emau fakamālō ki he ngaahi fale‘i mo e fakahinohino fakapotopoto na‘e fakahoko mai ‘ekinautolu kotoa pē mei he kāinga Tonga nofo Aotearoa New Zealand pea mo kinautolu mei tu‘apule‘anga, ‘o lava ai ke fakahoko e fatongiá ke toe loloto mo mā‘opo‘opo ange ‘a ‘etau ‘iló pea me‘atēpu foki, ke tau mo‘ui lelei mo nonga hono kotoa.

Vailasi Papilomá (HPV) mo e kanisā kau‘itaungafanaú

Meimei ko e kotoa ‘o e kanisā kau‘itaungafanaú, ‘oku fakatupu ia ‘e he Vailasi Papilomá. Ko e vailasi angamaheni eni pea ‘oku mafola he feohi matu‘aki vāofi kili-ki he-kili pe ko e nonofo fakamalí (sexual activity). Ko e Vailasi Papilomá ‘oku meimei tofuhia ai e kakai lalahi kotoa pe.

‘I he kakai tokolahi, ‘e molengofua pē ‘a e Vailasi Papilomá ‘iate ia pē, ka ‘oku ‘i ai e fa‘ahinga ia ‘o e vailasí ni ‘oku nau mo‘ui tolonga mo molengata‘a pea lava ke nau fakatupu e liliu ‘i he selá (cells) ke hoko ko e kanisā.

‘E meimei ta‘u ‘e 10 pe lahi ange pea toki hoko ke kanisā ‘a e kau‘itaungafanaú. ‘I hono fai ma‘u pe ho‘o sivi-tokamu‘a tu‘upaú (regular screening), ‘e lava ke ‘ilo ai ‘a e liliu e sela ‘o e kau‘itaungafanau ‘o ha ni‘ihi, pea ke sinaki fai ha faito‘o kimu‘a ke ‘oua na‘a hoko ko ha kanisā.

Ka ma‘u leva ha Vailasi Papiloma, ‘oku ‘ikai ‘uhinga ia kuo ke puke ‘i he kanisaá, he ‘oku lahi ‘a hono ngaahi tu‘unga kehekehe ‘o kamata mei he ‘asi ‘a e Vailasi Papiloma, hoko e liliu ki he sela fakatupu kanisaá, pea toki kanisā.

Ofi ki he peseti ‘e 90 ‘o e kakai sivi tokamu‘á, ‘oku ‘ikai ma‘u ai ‘a e Vailasi Papilomá pea ke hoko atu pe ‘enau sivi-tokamu‘a tu‘upaú. Ko e peseti ‘e 10 ‘oku toé, ‘e ma‘u ai ‘a e Vailasi Papiloma pea ‘e fiema‘u ke hoko atu ha sivi makehe ‘o kinautolu.

Ko e kanisā kau‘itaungafanaú ‘a e taha ‘o e ngaahi kanisā ‘e malava ke fai ha ngāue ke tau hao mei ai.

Ko e sivi-tokamu‘a (screening) ‘o e kanisā kau‘itaungafanau

Ko e huhu-malu‘i Vailasi Papilomá, fakataha mo e sivi-tokamu‘a tu‘upaú, te ne fakasi‘isi‘i‘a e puke mo e mate ‘i he kanisā kau‘itaungafanaú. ‘I ho‘o kau ‘i he Polokalama Sivi-tokamu‘a ‘i he fonuá ni (National Cervical Screening Programme) mo toutou fai ‘a e sivi-tokamu‘a tu‘upaú, ‘a e founga lelei taha ke malu‘i koe mei he kanisā kau‘itaungafanaú, koe‘uhi ke ke mo‘ui lelei ai mo ho fāmilí. ‘Oku ta‘etotongi he taimi ni ‘a e sivi-tokamu‘a ko‘eni, ma‘ae kakai fefine Pasifiki. Kātaki fetu‘utaki ki ho‘o kiliniki fakafaito‘o.

Kuo lava eni ke fai e sivi-tokamu‘a ki he kau‘itaungafanau, ‘i ha founga vave mo faingofua, fakata‘u nima, pea ‘oku ‘atā ke ke fai pe ‘e koe.

Ko e sivi Vailasi Papilomá ‘oku matu‘aki pau mo falala‘anga ‘ene lava ‘o tala pe ‘oku takaloto e vailasí pe ‘ikai. Te ne tuhu‘i tonu mai ‘a e peseti ‘e 10 ‘o e kau sivi- tokamu‘a ‘oku ‘asi ai ‘a e liliu ‘o e sela fakatupu kanisā ‘o e kau‘itaungafanaú pea ke fai leva ha faito‘o kei taimi ke ‘oua na‘a nau puke ai.

Ko e founga fo‘ou ‘o e sivi tokamu‘a ko‘ení ko e fakatotolo‘i e Vailasi Papiloma ‘oku ne fakatupu e peseti 95 tupu ‘o e kanisā kau‘itaungafanaú. Ko e siví ni te ke lava pe ‘e koe ‘o fai pea ‘oku ‘ikai hano kehekehe mo hano fai ‘o e siví ‘e ha neesi pe toketā ‘i ha kiliniki ke tokoni atu, pē ke nau to‘o ha huhu‘a mei he halangafanaú.

Teu ‘ilo fēfē pe ‘oku fiema‘u keu kau atu ki he sivi tokamu‘á?

‘Oku mahu‘inga ke ke kau mai ki he sivi-tokamu‘á kapau:

• ko e fefine koe pe ko ha taha ‘oku ‘i ai hao kau‘itaungafanau;
• ta‘u 25 ki he 69; 
• ‘oku ke lolotonga nofo-fakamali pe na‘a ke ‘osi nofo fakamali.

Kapau na‘e ‘osi tafa ‘o to‘o e taungafanaú mo e kau‘itaungafanaú, pea ke ‘eke ki ho‘o kiliniki fakafaito‘o pe ‘oku tonu ke ke kei kau ki he sivi tokamu‘á.

Kapau ‘oku ke feitama, ‘e kei lava lelei pe ke ke sivi tokamu‘a. Kapau ‘oku ke lolotonga puke fakamāhina, ‘oku kei lelei pē ke ke sivi tokamu‘a, tukukehe kapau ‘oku ke fu‘u ‘au, he ‘e uesia ai e ola ho‘o sivi.

‘I he toko 180 te nau puke ‘i he kanisā kau‘itaungafanaú he ta‘u kotoa, ko e peseti ‘e 85 na‘e te‘eki pē ke nau kau kinautolu ‘i ha sivi-tokamu‘a tu‘upau.

‘Oku toe faingofua ange he lolotongá ni, ‘a e sivi tokamu‘a kau‘itaungafanau. ‘E lava ke ke fili ‘a e founga sivi te ke loto ki ai.

Ko e sivi Vailasi Papilomá (HPV) mo e founga sivi te ke fili mei ai.

1: Huhu‘a mei he Halangafanau

Ko e founga lelei eni ki he ni‘ihi tokolahi. ‘E toki fakahinohino atu kapau ‘oku ‘i ai ha founga kehe ia ‘e tuha mo koe.