Supporting your care with shared health information - Te tautoko i ō maimoa mā ngā mōhiohio hauora pātahi - te reo Māori - HE2969-MRI

Ngā mōhiohio hauora kua whakawhānuitia, ngā maimoa pai ake

Kei te whakawhānuitia e mātau ngā mōhiohio e wātea ana ki ō rata me ētahi atu kaiwhakarato hauora, ahakoa kei hea koe i Aotearoa. Kei te mahia e mātou tēnei mā tētahi pūtūhono mōhiohio hauora hou e kīia ana ko te Pūkete Hauora Matihiko Pātahi.

• Mā tēnei ka kitea e ngā kaiwhakarato hauora ō mōhiohio hauora hira kia tino manaakitia koe e rātou, tae atu ki ngā āhuatanga whāwhai i ngā wā kāore koe i te kāinga.
• Ko te whakarite kia wātea mai ēnei mōhiohio i ngā whare rata, ngā taka rongoā, ngā hōhipera, ngā ratonga waka tūroro me ngā whakanōhanga tiaki tūroro e tiaki ana i a koe.
• Kua tuaritia kētia ngā mōhiohio hauora i ētahi rohe – ka noho wātea mai i te motu whānui mā te Pūkete Hauora Matihiko Pātahi.
• Kei a koe te tikanga ki te ārai i ētahi, te katoa rānei o ō mōhiohio kia kaua e tuaritia.

Rapu mōhiohio atu anō i Supporting your care with shared health information

Ngā mōhiohio ka tuarihia

Ka kohikohi, ka tuari hoki te Pūkete Hauora Matihiko Pātahi i ngā mōhiohio hauora. Kei reira ngā whakahaere matatapu me te haumaru pākaha hei whakamaru i ō mōhiohio hauora me te aroturuki i te hunga ka toro atu.

Ka ahu mai ētahi o ēnei mōhiohio i ngā pūnaha IT o ngā wāhi pērā i tō whare rata, ngā maimoa whāwhai me ngā ratonga hauora ā-waea. Ka tuarihia hoki ngā mōhiohio mai i ngā pātengi raraunga ā-motu a Te Whatu Ora.

• Kāore ō mahi atu anō mēnā kei te pai ki a koe kia tuarihia ō mōhiohio hauora ki ngā kaiwhakarato hauora e tiaki ana i a koe.
• Mēnā e hiahia ana koe kia whakatepea, kia aukatia rānei te tuari i ō mōhiohio, kei ngā whārangi whai ake ō kōwhiringa. Ahakoa tō whakatau, ka whiwhi tonu koe i ō maimoa.
• Ka āhei koe ki te whakahē kia tuarihia ō mōhiohio ahakoa te wā.

Kei te āta tukuna haeretia e mātou tēnei kaupapa i roto i te wā. Ka tāpirihia haerehia e mātou ngā mōhiohio kei tēnei whārangi.

Tirohia te paetukutuku a Te Whatu Ora mō ngā whakamārama he aha ngā mōhiohio ka tuarihia: Supporting your care with shared health information

Ngā mōhiohio mai i ngā rata

Kei roto i ngā mōhiohio hauora ka kohia, ka tuarihia hoki e mātou mai i tō whare rata ko ō:

• mate pāwera me ngā pāweratanga – hei tauira, he pāwera ki te rongoā paturopi
• mate, pērā i te huangō, te matehuka me ētahi atu mate pūmau
• tohu ora pērā i tō pāmahana, kapa manawa me te pēhanga toto.

Ka whakaurua mai ētahi atu mōhiohio, pērā i ō taipitopito wā hui, tae atu ki ngā tuhipoka haumanu, ā tōna wā.

Ngā mōhiohio mai i ngā pātengi raraunga a Te Whatu Ora

Ka tuarihia anōtia pea mōhiohio mai i ngā huinga raraunga ā-motu a Te Whatu Ora mā te Pūkete Hauora Matihiko Pātahi.

Kei roto i tēnei ko ngā rongoā, ngā tuku awhikiri, ngā mōhiohio tautohu mai i ngā taiwhanga me ngā matawai, ngā hihi-X rānei; tae atu ki ngā mōhiohio hōhipera pērā i ngā tononga, ngā reta haumanu me ngā kōrero whakarāpopoto mō te tuku i te hōhipera.

Ō kōwhiringa me ngā mahi māu

Tuarihia aku mōhiohio

E hiahia ana ahau kia kite aku kaiwhakarato hauora i aku mōhiohio hauora.

He pai ki ahau kia tuarihia aku mōhiohio mā te Pūkete Hauora Matihiko Pātahi. Arā, ka whai taku rōpū hauora i ngā mōhiohio e hiahia ana rātou kia tere ai, kia haumaru ai hoki te tautoko i ahau.

Ngā mahi mā te tūroro: Kore noa iho 

Tohu tūmataiti

Kāore au i te hiahia kia kite ētahi atu kaiwhakarato hauora i ētahi, i te katoa rānei o aku mōhiohio mai i tēnei kaiwhakarato ina whakamaimoa ana ahau.

Ko taku hiahia kia noho tapu ētahi, te katoa rānei o aku mōhiohio ki waenga i a māua ko taku kaiwhakarato hauora*, ā, kia kaua e tuarihia mā te Pūkete Hauora Matihiko Pātahi. E mārama ana ahau kāore pea e whiwhi i ētahi atu o ngā ratonga hauora i aku mōhiohio katoa.

Ngā mahi mā te tūroro: Me kōrero atu ki tō kaiwhakarato hauora. *Me kōrero ki a rātou ko ēhea ngā pūkete takitahi me noho matatapu.

Te tuari wāhanga

Kāore au i te hiahia kia tuarihia aku mōhiohio hauora mā te Pūkete Hauora Matihiko Pātahi.

E kōwhiri ana ahau kia:

• wehe tūturu, tērā rānei
• kaua e tuari mōhiohio tauwhāiti (pērā i ngā rongoā, tuku awhikiri rānei).

Arā, ina pā he ohotata kāore pea te hunga whakamaimoa i ahau i te mōhio ki aku mōhiohio hauora engari ia mēnā ka taea e au te kōrero atu. E mārama ana ahau ka whai pānga pea tērā ki ngā maimoatanga ka whiwhi au.

Ngā mahi mā te tūroro: Whakapā atu ki Te Whatu Ora i 0800 144 751, īmēra rānei ki customerservice@health.govt.nz

He pēhea te āwhina a te tuari mōhiohio

Te haere ki te mahi

I tēnei wā: Ka haere he wahine nō Te Whanganui-a-Tara ki Tāmaki Makaurau ki te mahi. I tētahi ka hui ka kunanu ana kōrero, ā, ka heria atu ia ki te hōhipera i runga i te whakaaro he ikura roro. I te mea nō Te Whanganui-a-Tara ia, tē taea e ngā rata i te hōhipera i Tāmaki Makaurau te toro i ana mōhiohio hauora.

Mā ngā mōhiohio hauora: Ka taea e ngā kaimahi o te hōhipera o Tāmaki Makaurau ana mōhiohio hauora. Ka kite rātou ka pā mai te ānini ki a ia me te ngaro o te kōrero. Ka taea e rātou te whakamaimoa wawe i a ia, i runga i te mōhio ki ēnei mōhiohio hira.

Te kite i te whānau

I tēnei wā: I haere he koroua 80 ōna tau nō Kirikiriroa ki te kite i ana mokopuna i Ōtautahi, ā, ka whara i a ia i hinga. He pāwera ia ki te rongoā patu mamae engari kua wareware ia ko tēhea. Tē taea e ngā kaimahi waka tūroro te toro ana mōhiohio ki te tirotiro.

Mā ngā mōhiohio hauora: Ka taea e ngā kaimahi waka tūroro te toro ana mōhiohio hauora me te kite ko ēhea ngā rongoā e pāwera ana ia. Ka wawe tonu, ka haumaru hoki te tuku rongoā kē ki a ia.

Kaimahi ā-wāhanga

I tēnei wā: Ka mate huangō he kaimahi huarākau nō Whangārei, ā, ka haere ia ki tētahi whare rata kōhukihuki i Whakatū. Tē taea e te rata te toro ana mōhiohio hauora, ā, ka whakamaimoa ia i ōna tohumate huangō kei te kino haere.

Mā ngā mōhiohio hauora: Kei te kite te rata o Whakatū i raruraru te wahine i ētahi matū ahuwhenua tauwhāiti i mua. I pā ia ki ēnei matū i nā tata nei. I te mea kei a ia ēnei mōhiohio katoa, he rerekē te whakamaimoa a te rata i a ia.

Tamaiti māuiui

I tēnei wā: Kei te tiaki tētahi wahine nō tuawhenua i ana mokopuna. I te pō, ka pāngia te tamaiti, rua tau te pakeke, e te maremare, ā, ka tino tere haere te hēhē. Kei te mōhio te kuia i pā mai ngā raruraru hēhē ki a ia i mua engari kāore i te maumahara ki ngā taipitopito, kāore e taea e ia ana mātua, te whakaū rānei i ana rongoā, tana hītori hōhipera rānei. I runga i te mōhio kāore e kitea tētahi mea nui, ka tūtohu tētahi rata tuihono tētahi aromatawai ED. Tata ki te kotahi haora te taraiwa a te kuia i te waenga pō ki te hōhipera me ngā tamariki e toru.

Mā ngā mōhiohio hauora: Kei te kite rata tuihono i te pūkete hauora a te tamaiti, tae atu ki te tīmohu, ngā ngongō tūtohu, ā, kāore he hītori o te mate huangō, te uru rānei ki te whāomoomo. Whai muri i tētahi aromatawai ataata, ka whakamārama atu te rata ki te kuia he pai noa iho tana noho ki te kāinga, ka whakamārama atu i tana mahere whakamaimoa noa, me te whakatakoto i ngā tohu me whakatūpato. Kua kore e mate ki te haere ki te ED i te waenganui pō. 

Te wā ka tīmata te tuari mōhiohio

Ka wātea mai ō mōhiohio hauora hira ki ētahi atu kaiwhakarato hauora i roto i te wā, i a rātou ka tūhono ki te Pūkete Hauora Matihiko Pātahi. Ka tuarihia hoki ngā momo mōhiohio hauora tāpiri i roto i te wā – tirohia a healthnz.govt.nz/SharedRecords mō ngā taipitopito.

He pātai? Ka taea e mātou te āwhina

• Mēnā he pātai āu mō te kohinga o ō mōhiohio hauora mā te Pūkete Hauora Matihiko Pātahi, me kōrero ki tō kaiwhakarato hauora, waea mai ki 0800 144 751, īmēra rānei ki customerservice@health.govt.nz
• Ka taea hoki e koe te waea, te īmēra mai kia wehe atu, kia hoki mai anō rānei ki te Pūkete Hauora Matihiko Pātahi
• Mēnā he pātai tūmataitinga tāu, he amuamu rānei, me whakapā atu ki customerservice@health.govt.nz
• Mēnā kei te hiahia āwhina koe hei tuku whakatau, te kōrero rānei ki tētahi tangata e pono ana koe.

12 ki te 15 ō tau?

Mēnā kāore koe i te hiahia ki te tuari i ētahi, te katoa rānei o ō mōhiohio – kei te hiahia rānei ki te tuari anō – me kōrero ki tō matua, kaitiaki rānei, tō rata rānei. Mēnā kei te hiahia koe ki te wehe tūturu i te tuari mōhiohio, me waea mai ki 0800 144 751, īmēra rānei ki customerservice@health.govt.nz

Ētahi atu tikanga e whakamahia ana ngā mōhiohio hei tautoko ratonga hauora

Ka kohia e Te Whatu Ora ētahi mōhiohio mai i ngā kaiwhakarato hauora hei āwhina i a mātou ki te whakarite mahere me te utu ratonga, te tirotiro kei te pēhea te haere o ngā āhuatanga, ā, kia pai ake hoki te tautoko i te hauora mō te katoa.

Ka whakamahia e mātou ngā mōhiohio mō ngā mahere me ngā pūrongo. Whai muri i tā mātou kohikohi mōhiohio, ka whakarōpūtia e mātou kia kite ai he pēhea te āhuatanga i te motu me tō rohe. Hei tauira, ka tirotiro pea mātou ki te ōrau o te hunga e whiwhi ana i ngā tūmomo maimoa tauwhāiti.

Ka ū mātou ki ngā ture tūmataiti pākaha, ā, kāore mātou e whakaputa i tētahi mea e mōhiotia ai koe. I te nuinga o te wā, e hono ana ō mōhiohio ki tētahi nama, kaua ki tō ingoa, tō wāhi noho rānei.

He haumaru, he nawenawe ā mātou pūnaha. Me mātua whai te hunga e whakamahi ana ēnei raraunga i ngā ture pākaha. E rokirokitia ana e mātou ō mōhiohio ki tētahi pūnaha kapua haumaru he kaha ōna whakamaru, tae atu ki te whakamuna, te whakahaere urunga, me te aroturuki haere.

Ngā tauira o ētahi o ngā mōhiohio ka kohia e mātou:

• te roa o te whiwhi wā hui me te rata
• te maha o te hunga o tō hapori kua rēhita, kua whiwhi awhikiri rānei
• mēnā kei te whakamaimoatia koe e te rata, te nēhi rānei
• ngā mate, ngā whakamātau toto, ngā otinga taiwhanga, me ngā mōhiohio tātari mate pukupuku e āwhina ai kia mārama ai mātou ki ngā ratonga hauora e hiahia ana te tangata.

Tirohia a healthnz.govt.nz/ManagingInfo mō ētahi mōhiohio anō he pēhea te whakahaere a Te Whatu Ora i ngā mōhiohio, tae atu ki te Huinga Raraunga Maimoa Matua ā-Motu.

Haere ki te paetukutuku a Te Whatu Ora i healthnz.govt.nz/SharedRecords mō ētahi mōhiohio anō mō te Pūkete Hauora Matihiko Pātahi, tae atu ki tō tūmataitinga me te haumarutanga.