Whenua ki te whenua: he taonga mā tō whānau - te reo Māori - HE3326

tō tātou reo | advance care planning

Whenua ki te whenua

He taonga mā tō whānau

He kupu kōrero tēnei hei tautoko i tō kōrero i mua i te whakaoti mahere atawhai.

E hono ana tātau ki te whenua mai i te matihe o te ora tuatahi tae noa ki te whakamutunga.

E kawea ana te wairua i roto i te puku o te hau ki te okiokinga o ngā tīpuna.

I te whānautanga, ka hoki ki tō tātau pito me tō tātau whenua ki te whenua. I roto i ngā rā o tō tātau ao ka toro tātau ki te poipoi i te manaakitanga – ka haere tonu tēnei tae noa ki te matenga.

He mea nui te tautuhi i te whānau, ngā kaimanaaki me ngā tautoko mō tō tātau hokinga whakamutunga ki tō tātau whenua - ā-ritenga, ā-tinana, ā-wairua.

Ka āwhina tēnei tuhinga i a koe ki te whakaaroaro me te kōrero mō tō mahere manaaki mō ā muri ake.

Nā Len Hetet (nō Ngāti Tūwharetoa, Ngāti Maniapoto, Te Ātiawa me Ngāti Apa) tā mātou tohu i waihanga i whakamārama.

He kuaka te manu i tēnei rauemi. E ai ki te kōrero, ka hoki tahi atu te kuaka me ngā wairua ki Hawaiki.

He taonga mā tō whānau

He aha te take me whakarite mahere manaaki mō ā muri ake?

• Kei te mōhio tō whānau he aha ngā mea hira ki a koe ki te rerekē ngā āhuatanga o tō hauora
• Kei te mōhio ō mātanga hauora ki ngā mea nui ki a koe mō tō manaaki me tō whakamaimoa
• He whakamōhio atu i ō hiahia ki te tangata i ō rā whakamutunga
• He whakaatu i ō hiahia mō tō tangihanga/nehu
• Mā te whai i tāu e pai ana i taua wā ka tau te āio ki tō whānau me ōu hoa i tō wehenga atu.

Mō āhea koe tīmata ai?

• I te wā e pai ana koe
• I te wā e māuiui ana koe, he mate mauroa rānei tōu
• I te wā o tō whakamaimoa, hāparapara rānei i whakaritea
• Ina whakapono ana koe kua tata haere koe ki ō rā whakamutunga.

Koinei te wā pai rawa ki te whakarite i tētahi mahere manaaki mō ā muri ake.

Mēnā e pai ana koe, me whakaaroaro pea koe mō ēnei mea:

• He uara ōu, he whakapono, he tikanga hoki, tēnā, ngā mea e hira ana ki a koe?
• He aha ngā mea e whaitake ai tō rā?
• Ko wai te hunga e hiahia ana koe ki te whai wāhi atu?
• He mate anō pērā i te mate pukupuku, mate manawa, matehuka rānei i roto i tō whānau ka whai pānga pea ki a koe ā tōna wā?
• E mōhio ana koe ki tētahi tangata ka mahi pai i ngā taipitopito kia oti rawa? He aha ā rātou mahi māu?
• Ko wai tētahi tangata mārire, tangata poipoi e hiahia ana koe ki te tauwhiro i a koe ina māuiui?
• Te tirotiro i ngā utu me ngā utunga mō ngā manaaki ā muri ake, te tangihanga rānei
• Ko wai atu anō i tō whānau ka hiahia manaaki me te tautoko atu anō?

Mēnā kei te māuiui, me kōrero mō ēnei mea:

• He pēhea ō whakaaro mō ngā rā e heke iho
• Ka pēhea pea te rerekē haere o tō hauora ā muri ake
• Ka pēhea pea te pānga o tō hauora me tō whānau
• Ko wai atu anō hei tautoko i a koe me tō whānau
• Ki te tino uaua ngā āhuatanga i te kāinga, he pēhea ō whakaaro kia tiakina koe i ngā kāinga kē o te whānau, i tētahi hōhipera tūmatanui, hōhipera tūmataiti rānei, ngā whare tiaki kaumātua, ratonga tiaki tūroro rānei?
• Ina rerekē ngā uara me ngā whakapono o roto o tō whānau, he aha mā rātou?
• Mēnā he poto te wā, he aha ō kaupapa matua?
• Te pēhea e rerekē ai, e tūtatari ai āu mahere nā te mate urutā, ohotata ā-motu rānei. Ka taea e koe āu tikanga te huri, te whakaoti rānei a muri ake nei?

Mēnā kua tata te tō o te rā ki a koe, me kōrero pea koe mō ēnei mea:

• He aha te tikanga o te kounga o te ora ki a koutou ko tō whānau ināianei
• He pēhea te āhua o te matenga pai ki a koe
• He pēhea ki a koe ngā rongoā me ngā whakamaimoatanga hei pēhi i te mamae me te whakahā
• Te tirotiro i ngā āhuatanga taha wairua me te tangata
• Te tuku kōrero, taonga hoki ki tō whānau, te tuku mōhio me ngā tikanga ki ētahi tāngata ake
• Ki hea koe mate ai, ā, ko wai te hunga ki te taha i a koe.

Me kite i pēhea ētahi atu tāngata i whakarite ai i te mahere atawhai me ēnei pūrākau:

Mātakitakina ā rātau kōrero mō te whakarite mahere i mua noa atu i konei: Advance care planning

Kia kōrero : mō te whakarite manaaki mō ā muri ake

Tīmataria tō mahere i tēnei rā

Tīkina he mahere atawhai hei whakaoti:

• Tīkina atu i Advance care planning
• Pātaihia tō tākuta, tō nēhi rānei mō tētahi kape.

Hei whakatutuki i tō mahere:

• Kia kore ai koe e mate ki te whakaoti i te wā kotahi… me āta haere
• Me kōrero ki tō whānau me ō hoa
• Me kōrero ki tō tākuta, nēhi rānei
• Me ngākau tuwhera – ka mīharo pea koe
• Ka taea e koe te hoki atu anō ka whakatikatika ahakoa te wā
• Ka kaha āwhina tō mahere atawhai i te whānau, ngā hoa ā tōna wā.

Ina oti tō mahere:

• Me kōrero tahi me tō whānau
• Me kōrero tahi me tō tākuta me ngā mātanga
• Whakamōhio atu ki ngā tāngata he mahere atawhai tāu, ā, ki hea kitea ai.

Ka tau tō mauri, me ō ētahi atu, i tō mahere manaaki mō ā muri ake.

E hono ana tātau ki te whenua mai i te matihe o te ora tuatahi tae noa ki te whakamutunga.

E kawea ana te wairua i roto i te puku o te hau ki te okiokinga o ngā tīpuna.

Tihei mauri ora!

Kua tipu ngā rākau
Kua pūāwai ngā hua
Kua waiata ngā manu
Kua tau te wao
Kua tau, kua tau, kua tau e
Haere mai te āiotanga
Haumi e, hui e, tāiki e

Mō ētahi atu kōrero haere ki Advance care planning ki tō kaiāwhina