Rogrog ne sạkior tēet ne hö‘ạkim ka kel‘akim ne tēet räe - Positive bowel screening test result: What happens next - Rotuman - HE2713

Rogrog ne sakior tēet ne finäe ne hö‘akim ka kel‘akim ne tēet räe (Positive) – ka tes täe la sok ‘e ‘on ‘ihete‘?

‘Ou rogrog ne sḁkior tēet ne ‘ou finäe ne hö‘ḁkim ka kel‘ḁkim ne tēet räe (positive) ‘on fūḁga toto sḁkior ma räe ‘e ‘ou tē raksa‘a (fi‘o). ‘Äe kop ma la kokon ‘e rēko rog te‘is. Tēkäe te‘is a‘mou soksok, ka iḁ tē pumuet la ‘äe la noh a‘häe‘åk ne rogrog ne sḁkior tēet ne hö‘ḁkim ka kel‘ḁkim ne tēet räe kat ‘ḁligen ra ne ‘äe pō pḁu ‘e känsa ne finäe, tēkäe te‘is kop la sḁkior se muḁ la a‘fūmou‘ḁkia. ‘E av ‘e ‘on rerege, toto la pō la no‘ ‘e ou tē raksa‘a (fi‘o) ‘e rēko punå‘ ne kop ma la fup ‘e ‘ou laloag finäe (bowel polyps), ne hün se kḁinag ‘af‘af hoi‘åk fak se haemorrhoids (piles). ‘Af‘af tape‘i la pō se‘ ma la ao pot a‘vavhiḁn.

Ka tes täe la soko?

‘Äe kop la kel‘åk ma sḁkior a‘toton la ‘inean ne tes ta ‘on hün ne toto no‘om ‘e ‘ou tē raksa‘a (fi‘o). Garuet ne a‘mou a‘a‘sok la sḁkiroa ‘ou finäe ta colonoscopy.

Le‘et ‘e kḁugarueagat ne mou se bowel screening programme ‘e ‘ou laloag pure‘ag ta täe la he‘of se ‘äea la hḁifäegag ma fḁia ta terḁnit la a‘sokoa ‘ou colonoscopy. ‘Äe la pō la sḁio‘ tē se irisa ‘e rēko garue te‘is colonoscopy. ‘Äe la pō tape‘ ma la hḁifäegag ma ‘ou tḁk ta.

Ka tes ta garue te‘is colonoscopy?

‘E av ne garue te‘is colonoscopy la a‘soko, ta tḁkut ne nḁsit ne pot se tākäe te‘is täe la a‘es‘ao‘åk ta tē sikiḁg mḁl mea‘mea‘ pḁut la sḁkior se laloag ma farfar ne ‘ou finäe (large bowel ne colon). Tē sikiḁg mḁl te‘is täe la ‘e is ne ta pḁip parpar het (flexible tube), ne la tem‘åk se ‘ou laloag finäe ‘e ‘ou fi‘oga (muri). Tē sikiḁg mḁl te‘is a‘es‘ao‘åk la sḁkiroa laloag ma farfar ne ‘ou laloag finäe la ‘inean ne ma ‘on noanoat ne pefḁ‘it täe ‘e ‘on rerege.

Garue te‘is colonoscopy la pō la sḁkior la ‘inean ne ma ‘on punå‘ ne känsa ‘e ‘ou laloag finäe. Kḁinag punå‘ te‘is polyps ‘eagke‘ea känsa ‘e ‘on kamataga, ka la pō se‘ ma la fup ma für la hele‘ la iḁ la känsa ‘e laloag ne fḁu his. Nōnō ka la sḁkior ma räe ne ma ‘on punå‘ (polyps) täe ‘e ‘ou laloag finäe, famör garue täe la ‘ut‘ḁkia punå‘ ta la toak‘ḁkia känsa ‘on la fuput ‘e laloag finäe. Punå‘ ne la ‘ut‘ḁki täe la nā se ta laboratory la sḁkior a‘toton ne känsa täe ‘e laloag punå‘ ‘i ne ‘igkå‘.

‘El se‘ ma la famör hif ‘e te‘ ne famör 10 ne sur la a‘sok ‘e garue te‘is colonoscopy ‘e prokräm te‘is National Bowel Screening Programme la räe ne iris pō ‘e punå‘ te‘is polyps.

‘El se‘ ma la famör hif ‘e te‘ ne famör 100 ne sur la a‘sok ‘e garue te‘is colonoscopy ‘e prokräm te‘is National Bowel Screening Programme la räe ne iris pō ‘e känsa. La hḁitḁuag ma ‘on tā ‘e ‘on fol (1/3) ne kḁinag känsa ne sḁkior ma räe ‘e ‘amnåk te‘is kat seminte fup hḁhḁiḁ ra ne forås ra.

Ka garue te‘is la rū?

Famör ‘e ‘on rereg kal ‘oaf ra se garue te‘is colonoscopy ma kop ma la tḁu rū mea‘mea‘. Colonoscopy kat seminte a‘sok ra, ka vḁit täla nāaf se ‘äea la teak la pō la a‘mosea ‘äe ma ao potoa rū ne kop ma la agtḁum ‘e av ne colonoscopy la a‘soko. La ma ‘on tḁk ma nås ‘e laloag rum ta ‘e av ta‘ag la matḁ‘ua ‘äe ma aga garue ta. 

Ka ‘it la a‘potsusun tapen ‘ita se colonoscopy?

‘Äe ka seminte sur ra la a’sokoa colonoscopy, ka ‘ou finäe kop la a‘taf la pō la laloag finäe ta la pō la sḁkior a‘vavhiḁn. Iris kop ma la far‘åk se ‘äea la toak ‘e ‘ā ‘e tēla‘ā ‘e ‘on rerege ‘e terån his ne kā se ‘ou colonoscopy. ‘Äe kop la ‘iom ‘e ta kḁinag tḁnut la hḁiasoag la a‘tafan ‘ou finäe, ma täla rē la ‘äe la fa‘ la‘ se fḁ‘. Fas‘åk tē ne mou se tēkäe te‘is täla pån ma nāaf ma ‘ou pukut ne a‘fūmou‘ḁkia avat ne fḁi la a‘sokoa garue ta.

Ka tapen ‘on roa ne avat ne gou kop la sur haspet?

‘On la a‘sok ne garue te‘is colonoscopy la hḁitḁuḁg ma aoa‘ het, ka ‘äe kop la noh ‘e hḁspet ta la aoa‘ he his.

Ta nḁsit ne tḁkut täla hḁifäegag ma ‘äea ka ‘ou colonoscopy kat seminte a‘sok ra la togia sḁio‘ ne ‘äe pa sḁi‘o. Iris täla far‘åk se ‘äea la hat ma säen ta puk aier‘ḁkiget (consent form). ‘Ou kḁunohoag ta ma kḁinaga la pō la noh karḁu ma ‘äea ‘e avat ne ‘äe kat 
seminte sur ra la a‘sokoa colonoscopy.

Iḁ tē pumuet la ‘äe la far‘åk se ‘ou ut garueag ta ne ‘äe kal garue ra ‘e tör ne terån ta‘ag la pō la ‘äe la a‘u‘uḁ ‘e vḁhiḁg ne colonoscopy.

Iḁ kat lelei ra la ‘äe la ül motokā ne la‘ se garue nōnō ka ‘äe la teak ‘e vḁit ne la a‘mosea ‘äea.

Ka ma ‘on pefå‘ ne ökök pō la sokom ‘e rēko colonoscopy?

Garue te‘is colonoscopy ti‘ ke av la‘ lelei ka kat ‘es noanoa ne ökök ra. Ka, fakma se kḁinag garue ne a‘sok la a‘lelei foro fak se sere, noanoa ne okoki kop ma la sok ‘e av ‘e ‘on rerege. ‘On mamḁr ne ta pefḁ‘it kop ma la soko, fak se ra‘ogat ‘e laloag finäe ta ‘e 
av ne la ‘ut‘ḁkia punḁ‘i, mea‘mea‘ pḁu. Nōnō ka tē te‘is la soko, ‘äe kop ma ke la sur hoi‘åk la a‘sok ta garuet la ao potoa.

Ka gou ke la tög ta tēet la a‘sokoa colonoscopy, sakior tē hoi‘akit ne vai ne ‘af‘afa?

Garue te‘is colonoscopy, ma sḁkior tē hoi‘åk ne kop la a‘sok, ma vḁi ne ‘af‘af ne kop la a‘es‘ao‘åk se garue ta, kat a‘noa tög ra kepoi ka ‘amnåk ‘atakoa ‘i la a‘sok ‘e laloag maj ofrḁu fak matanitū ne mou se måür fak foro ma nōnō ka ‘äe vā‘ön‘åk fak foh la pō ‘e tēkäe ‘i ka kat a‘noa tög ra.

Ka tapen se‘ nōnō ka gou kal pō ra se tēranit ne fai la a‘sokoa garue ta?

Figalelei ma he‘ mijim se ‘ḁmisa nōnō ka ‘äe kal pō ra se ‘ou colonoscopy. A‘es‘ao‘åk ‘e nampā ne telefonot ne nāaf ‘e ‘ou pukut ne a’fūmou’ḁkia avat ne fḁi la a‘sokoa garue ta.

Ka tapen se‘ nōnō ka la hö‘akim ne gou pō ‘e känsa ne finäe?

Nōnō ka ‘äe pō ‘e känsa ne finäe, iris täla nā ‘äe la kel‘åk se ta tḁkut ne pot ka majḁu se ao pot ne känsa (specialist). Salat ne a‘mou a‘es‘ao‘åk la ao potoa ma a‘lelela känsa ta sere (surgery). ‘Äe kop ma ke la a‘sok tape‘ ma ‘e garue te‘is chemotherapy ne.

Ka tapen ‘on lelei ma ‘es‘ao ne sal ne la ao potoa känsa ne finäe?

Se famör ne pō ‘e känsa ne finäe ka pō ma räe mij ‘af‘af ta ‘e avat ne kat seminte fup hḁhḁiḁ ra ne forås ra, sal ne la a‘es‘ao‘åk la ao potoa ‘af‘af ta la a‘leleia la ‘es‘ao se‘. Nōnō ka känsa ta la räe fep, ‘e avat ne ‘af‘af ta fup ma forås a‘fuamamḁu e, iḁ la noanoa se‘ la ao potoa.

La pō rogrog hoi‘åk

• Sḁkior se TimeToBowelScreen.nz
• He‘ se ‘ḁmisa, ka kat tög ra, ‘e nampā ne telefon te‘is 0800 924 432, Mḁnrē se Rån Lima 8am – 6pm
• Få‘ ma nāam ta ‘imel het se info@bowelscreening.health.nz

La pō rogrog hoi‘åk ‘e rēko famör ne va‘ön‘åk la pō ‘e hḁiasoag fak måür fak foro ‘e maj fak matanitū ‘e hanue te‘is, sḁkior se website ne mou se Health New Zealand | Te Whatu Ora Eligibility for publicly funded health services – Health New Zealand | Te Whatu Ora ne he‘ se nampā ne telefon te‘is 0800 924 432

Kainag Fäeag Hoi‘åk ma Sal ne Haiväeag Rogrogo

Puk te‘is pō la hat ma sḁkior ‘e kḁinag sal hḁiväeag rogrog hoi‘åk la a‘vavhina e ‘ou la ‘inea ne rogrog ‘i ka hḁiväeag tape‘ ma ‘e kḁinag fäeag ‘i: 

Te Reo Māori, Te Reo Māori Kuki Airani, Fäeag Sa‘moa ta, Fäeag Fit ta, Fäeag Rotuḁm ta, Fäeag Kilpåt ta, Fäeag Toag ta, Fäeag Tuvalu, Fäeag Niue ta, Fäeag Tökrḁu ta, Fäeag Jäen fo‘ou ta, Fäeag Jäen fak tēmamfue ta, Fäeag Korea ta, Fäeag ‘Intiḁ ta, Fäeag Punjabi, 
Fäeag Tagalog, Fäeag ‘Arapea ta ma Fäeag Burmese ta.