Maua iuga o le suesuega o le taufale ua aafia (positive) - Positive bowel screening test result - HE2711

O le ā le isi mea e sosoo ai?

Maua iuga o le suesuega o le taufale ua aafia (positive) - o le ā le mea e fai nei loa?

O le maua mai o le iuga o le suesuega o lou taufale ua e aafia, o lona uiga ua filogia le toto i lau fe’au mamao. Atonu e te lagona se atuatuvale po ua e popole. O lagona e masani ai, ae tāua ona iloa, o le iai o se iuga mai suesuega e faapea ua aafia, e lē faapea ai ua e maua i le kanesa o le taufale. Pe a tau filogia teisi lau fe’au mamao i le toto, e masani ona mafua mai i polipe (polyps) e ola i luga o le gaau tu (growths), poo nai nisi faaletonu laiti e pei o haemorrhoids (piles). E faigofie lava ona togafitia.

O le ā le isi mea e sosoo ai?

O le a moomia ona toe fai nisi suesuega o oe mo le sailia o le mafuaaga o le piliki poo le alu o lou toto. O le siaki e masani lava ona fai mo le suesuega o le taufale e faaigoa o le colonoscopy. 

O le a fesootai atu se tasi mai le polokalame o le suesuega o le taufale mai le tou pitonuu, e faatulaga se aso e fai ai lou colonoscopy. O le a mafai ona e fesili iai i se mea e te fia silafia i le colonoscopy. E mafai foi ona e talanoa atu i lau fomai.

O le ā le colonoscopy?

I le faatinoga o le colonoscopy, o le a iai se fomai a’oa’oina faapitoa poo se tausi soifua o le a vaai toto’a i totonu i le taatiaga o lou gaau taoto, e faaaogā ai se tama’i mea pu’eata. O lea mea pu’eata e faatulaga i le iuga o se tube manifinifi vavai, e faaui i totonu o lou gaau e sulu atu i lou maliuga. E faaaogā lea mea pu’eata e fā’ata ai le taatiaga o lou taufale ina ia iloa poo iai ni faaletonu.

O le fai o le colonoscopy e maua ai pe o i ai ni polipe (polyps) poo ni kanesa i le taufale. O polipe e lē o ni kanesa ae e ono tuputupu a’e ma avea ma kanesa a o faagasolo tausaga. A maua polipe, e masani ona aveesea, ina ia fesoasoani e teena ai le maua i le kanesa. O polipe ua aveesea o le a tuuina atu i le falesuetoto e siaki pe ua maua ai ni sela o le kanesa.

Mai le 7 i le 10 tagata e fai a latou colonoscopy o se vaega o le polokalame a le Atunuu mo Suesuega o le Taufale, o le a maua iai ni polipe. Pe tusa e to’a 7 mai le to’a 100 tagata na fai a latou colonoscopy o se vaega o le polokalame a le Atunuu mo Suesuega o le Taufale, o le a iloa ua maua i le kanesa. O le mea sili, o le tasi vae tolu o kanesa e maua o lea faatoa tau amata. 

E tiga?

O nisi tagata e tau lagona le lē mautonu i le fai o le colonoscopy. A’o lei fai le colonoscopy, o le a faainu ni au fualā’au e faamoe ai oe ma faato’afilemu ai ou faalogona a’o fai le colonoscopy. O le a iai le foma’i ma ni tausi soifua i totonu o le potu auā le vaaia o oe. 

E faapefea ona ou sauni mo le colonoscopy?

A’o lei faia lau colonoscopy, e moomia le faagaogao lou taufale ina ia mafai ai ona kilia le vaai lelei atu i le faataatiaga o lou taufale.

E ono moomia le taofia o lou taumafaina o nisi o mea taumafa i nai aso a’o lei oo i le aso o le colonoscopy. E moomia lou inuina o se vai faapitoa mo le faamamāina o lou taufale, e tupu ai lou fia alu i le falelēta’ua e kilia ai lou taufale. O le a tuuina atu ni faatonuga i lau tusi e faatonu ai lou avanoa.

O le ā le umi o le a ou nofo ai i le falema’i?

E masani lava ona lē atoa se itulā e fai ai le colonoscopy, ae e moomia lou iai 
i le falemai mo nai itula.

O le a talanoa atu se tausi soifua poo se foma’i ia te oe a’o le’i faia lau colonoscopy ma e tali atu ni au fesili e fia fai. O le a tāpā oe e saini se pepa faatumu o le maliega. E talia ni sui o lou aiga poo ni tagata lagolago e iai faatasi ma oe a’o le’i faia lau colonoscopy.

E taua lou mālōlō loa i lena aso atoa pe a mae’a ona fai lau colonoscopy. E lē saogalemu le aveina o se taavale pe faigaluega pe afai o loo e inuina fualaau e oso ai lou fia moe.

E iai ni lamatiaga mai le colonoscopy?

E masani lava ona saogalemu le faia o le colonoscopy. Ae peitai, e pei lava o le tele o togafitiga faafomai, e iai lava taimi e tutupu ai ni faafitauli. E iai sina lamatiaga e ono e piliki ai pe afaina lou taufale ona o le colonoscopy poo le aveeseina o polipe. Afai e tupu lea tulaga, e ono moomia le fai pea o nisi togafitiga.

Pe moomia ona ou totogia le faia o le colonoscopy, isi siaki poo togafitiga?

O le colonoscopy ma soo se siaki tulituliloa poo togafitiga ua faatulagaina i totonu o le polokalame faalauaitele a le soifua mālōlōina e leai se totogi pe afai e te agavaa ai.

E faapefea pe afai ua ou lē avanoa mo le taimi na faatulaga e vaai ai a’u?

Faamolemole vili mai matou i se taimi vave lava pe afai ua lē mafai ona e susū mai e fai lau colonoscopy.

Vili le numera o loo i lau tusi ua faatulaga ai le vaaia o oe. O le a matou toe faatulagaina se isi taimi mo oe.

Ae faapefea pe afai ua ou maua i le kanesa o le taufale?

Afai ua e maua i le kanesa o le taufale, o le a faasino atu oe e vaai le foma’i faapitoa. O le togafitiga masani o le kanesa o le taufale o le faia lea o le ta’otoga. E te ono moomia le faia o le chemotherapy poo le radiotherapy.

Pe mafai ona manuia pe a togafitia le kanesa o le taufale?

E telē le avanoa e ono manuia ai le togafitia o tagata ua maua i le kanesa o le taufale, pe afai ua faato’a amata ona aafia. Afai e faatoa iloa ane le kanesa ae ua leva ona iai, ua telē se afaina, o le a faigata foi ona togafitia.

Mo nisi faamatalaga

• Tagai i le TimeToBowelScreen.nz
• Telefoni e leai se totogi 0800 924 432, Aso Gafua i le 
   Aso Faraile 8am-6pm
• Imeli info@bowelscreening.health.nz

Ina ia iloa pe e te agavaa mo auaunaga a le soifua maloloina ua faatupe mai e le malo, tagai i le upega tafailagi a le Health New Zealand | Te Whatu Ora pe vili le 0800 924 432. 

Mo isi gagana ma faatulagaga

E maua foi le tamaitusi lenei i faatulagaga e faigofie ai ona faitau ma i gagana nei:

Te Reo Māori, Cook Islands, Samoan, Fijian, Rotuman, Kiribati, Tongan, Tuvaluan, Niuean, Tokelauan, Simplified Chinese, Traditional Chinese, Korean, Hindi, Punjabi, Tagalog, Arabic ma le Burmese.

TimeToBowelScreen.nz