Immunise Your Child on Time – te reo Māori version - HE1531

Reviewed
June 2020
This resource relates to the following topics:

Me ū ki te wā tika hei whakatō i te kano ārai mate ki tō tamaiti. Immunisation information in te reo Māori for parents and caregivers, including the recommended ages for babies to receive their immunisations.

Download resource

Download PDF

Order resource

Limited stock

Allow up to 3 weeks for delivery.
We’ll let you know if there are any problems.

Details

Reviewed
June 2020
Updated
June 2020
Format
Pamphlet DLE
HE code
HE1531
Language
Māori

The full resource:

Me ū ki te wā tika hei whakatō i te kano ārai mate ki tō tamaiti

Mā tēnā e ora ai tō tamaiti

Mēnā ko koe tētahi matua, kaitiaki rānei, māu tēnei mātārere.

Ko tāna he whakamōhio i a koe ki ngā wā tika hei whakatō i te kano ārai mate ki tō pēpi.

Ko te whakamarutanga tino pai mō tō pēpi, tō tamaiti rānei ko te whakatō kano ārai mate i te wā tika.

Tiakina tō tamaiti me tō whānau

Mā te rongoā ārai mate tō tamaiti e tino ārai i ētahi tahumaero taumaha 13. He koreutu kei Aotearoa ki ngā pēpi, ngā tamariki me ngā taiohi katoa tae noa ki tō rātou huritau 18*.

Ko te mahi a te rongoā ārai mate he āwhina i tō tamaiti ki te whakawhanake paturopi ki te whawhai tauhumaero. Ka ora anō i tēnei te tini manomano huri noa i te ao ia tau.

* E utua ana te whakatō kano ārai mate mā te hunga e 9-26 ngā tau; e utua ana te whakatō kano ārai mate MMR mā te hunga katoa i whānau mai i te 1 Kohitātea 1969.

He aha ngā take me whakatākano ārai mate?

Me whiwhi rongoā ārai mate te pēpi me te tamaiti hei ārai i te pā o ngā tahumaero taumaha.

Ko te tikanga ka whānau maivngā pēpi me ētahi momo ārai mate noa. Whiwhi ai te pēpi e whāinuinutia ana i ētahi anō paturopi i te waiū o tōna whaea. He poto noa iho te roa o te ārai mate noa, ā, kāore e tiakina tō pēpi mai i ngā mate katoa.

Ko te tūtohutanga me whakatō i te kano ārai mate ki tō pēpi, tamaiti rānei, i ngā wā tika kia tino ora ai ia.

Te taki haere i ngā whakatō kano ārai mate

Tīmataria ngā whakatō kano ārai mate a tō tamaiti ina eke ki te 6 wiki te pakeke, kia tino ora ai i te tahumaero.

Ko te Hōtaka Whakatō Kano Ārai Mate ā-Motu te rātaka o ngā wā tika mō te whakatō kano ārai mate. Kei te whakaatu I ngā wā tika me whiwhi rongoā ārai mate tō tamaiti kia tino ora ai ia.

Me whakatō i ngā kano ārai mate katoa ki tō tamaiti.

Titiro ki te Hōtaka Whakatō Kano Ārai Mate ā-Motu i te whārangi e whai ake nei. He mea nui ki te whakatō i te kano ārai mate ki tō tamaiti i te wā tika kia tino ora ai, engari mēnā ka tōmuri koe ko te tikanga ka taea te hoki anō ki te hōtaka tika. (Me mōhio koe: Me tīmata te whakatō kano ārai mate mō te huaketo puku [rotavirus] ā te ekenga o tō tamaiti ki te 15 wiki te pakeke.) Ki tō whakaaro kua hapa i tō tamaiti tētahi, ētahi o ngā whakatō kano ārai mate, me kōrero atu ki tō tākuta whānau, tapuhi rānei.

Ka tuhi te tākuta, tapuhi rānei i ia whiwhinga rongoā ārai mate a tō tāmaiti ki te Rēhita Whakatō Kano Ārai Mate ā-Motu (NIR) (Tirohia te whārangi 10 mō ētahi anō mōhiohio mō te NIR).

Kei te tuhia anō hoki ngā whakatō kano ārai mate ki te Tiwhikete Whakatō Kano Ārai Mate i tō Well Child Tamariki Ora My Health Book. Me mauhara ki te kawe i te Well Child Tamariki Ora My Health Book me koe hei hoatu ki te tākuta, tapuhi rānei i ia wā e haere ai tō tamaiti ki reira whiwhi rongoā ārai mate ai. Me whakaatu koe i te Tiwhikete Whakatō Kano Ārai Mate ina tīmata tō tamaiti i tētahi ratonga tiaki kōhungahunga, tētahi kōhanga reo, tētahi kura tuatahi rānei.

Kei a koe te tikanga mō te whakatō kano ārai mate – korero ki tō tākuta whānau, tapuhi rānei mēnā he pātai āu.

Te Hōtaka Whakatō Kano Ārai Mate ā-Motu

Ngā mate hei ārai

Kano Ārai Mate
Pakeke: Hapūtanga

Kauae-timu + whakapokenga korokoro + mare heihei (pertussis)

Boostrix®

Mate rewharewha Ka rerekē te ingoa hoko.

Pakeke: 6 Wiki

Huaketo puku (rotavirus) (me whiwhi i te wero tuatahi i mua i te 15 wiki) Rotarix® (ma te waha)
Whakapokenga korokoro + kauae-timu + mare heihei (pertussis) + whakamemeke + mate atekakā B + rewharewha Haemophilus momo b (Hib) Infanrix® hexa
Pūkahu kakā (pneumococcal) Synflorix®
Pakeke: 3 Marama
Huaketo puku (rotavirus) (me whiwhi te wero tuarua i mua i te 25 wiki) Rotarix®
(ma te waha)
Whakapokenga korokoro + kauae-timu + mare heihei + whakamemeke + mate atekakā B + rewharewha Haemophilus momo b (Hib) Infanrix® hexa
Pakeke: 5 Marama
Whakapokenga korokoro + kauae-timu + mare heihei + whakamemeke + mate atekakā B + rewharewha Haemophilus momo b (Hib) Infanrix® hexa
Pūkahu kakā (pneumococcal) Synflorix®
Pakeke: 12 Marama
Mate karawaka + mate repe pupuhi + karawaka Tiamana Priorix®
Pūkahu kakā (pneumococcal) Synflorix®
Pakeke: 15 Marama
Rewharewha haemophilus momo b (Hib) Hiberix®
Mate karawaka + mate repe pupuhi + karawaka Tiamana Priorix®
Koroputa hei (varicella)  Varivax®
Pakeke: 4 Tau
Whakapokenga korokoro + kauae-timu + mare heihei + whakamemeke Infanrix® IPV
Pakeke: 11 & 12 Tau

Kauae-timu + whakapokenga korokoro + mare heihei 

Boostrix®

Huaketo papilloma ā-tangata (HPV)

Gardasil®9
(2 werohanga, kia 6
marama te wehenga)

He aha ngā tahumaero taumaha e āraia ana mā te whakatō kano ārai mate?

He huaketo te koroputa hei (varicella) he āhua taumaha kore i te nui o te wā, engari ka taea ngā mate kino te pā mai pēnei i te niumōnia, ngā mate tākihi, manawa, pona, pūnaha tairongo rānei.

He momo whakapokenga korokoro te Diphtheria. Ka whakararu i te hēhē me te horomi. Ka pā kino hoki pea ki ngā io, ngā uaua me te manawa.

Ko te rewharewha haemophilus momo b (Hib) te pūtake o te kiriuhi ua kakā (he pokenga huri noa i te roro) me te koropuku korokoro [epiglottitis] (he koropuku kei te

korokoro ka aukati i ngā awa hēhē). Koia hoki pea te uptake o te pūkahu kakā me te pokenga o ngā monamona, i raro kiri hoki.

Ka pā ki te ate te atekakā B, ā, ka taea te ate te tūkino. Ka whakamāuiui me te whakangenge pea i te tūroro, ka mutu, ka whakakōwhai i te kiri.

Ko te huaketo papilloma ā-tangata (HPV) te pūtake pea o te mate pukupuku waha kōpū me ētahi atu momo mate pukupuku. He huaketo tēnei e noho whakaraerae ai tata ki te katoa o ngā pakeke i Aotearoa i tētahi wā. Koia te pūtake pea o ngā tona hema.

Ko te mate karawaka te pūtake o te kōpukupuku, te ihu hūpēpē, te maremare me ngā karu waiwai. He pūtake anō pea o te pūkahu kakā, ngā pokenga taringa me te mate roro.

Ko te repe hūware pupuhi te pūtake o te pupuhi i te kanohi, o te kirikakā me te kotiuru. He pūtake anō pea o te pupuhi i te roro, me te turi.

Ko te pūkahu kakā (pneumococcal) te pūtake o te pūkahu kakā, te kiriuhi ua kakā me te tāokenga toto. He pūtake anō pea o te pakohu ihu kakā me te pokenga taringa.

Mā te whakamemeke (poliomyelitis) te tinana e pararaiha me te whakararu i te hēhē.

Ko te huaketo puku (rotavirus) te pūtake o te ruaki me te kōrere. Ko te mutunga pea o tēnei ko te matewai kino, ā, i ētahi wā ko te matenga. Ko ngā piripoho ngā mea e tino mōrearea ana.

Ko te karawaka Tiamana te pūtake o te māuiui ngāwari ka whakaputa i te kōpukupuku me te mamae monamona. He mate taumaha mēnā ka pāngia te wahine e te karawaka Tiamana i ngā marama tuatahi o te hapūtanga. Ka pāngia pea tāna pēpi e ngā raruraru taumaha i te whānautanga, pēnei i te turi, te kāpō, te mate manawa me te mate roro.

Ko te kauae-timu te pūtake o te whakamakiki me te hukihuki o ngā uaua, tērā ka kaha whakararu i te hēhē me te horomi.

Ka tūkino te mare heihei, mare tekekō (pertussis) i ngā ngongo hēhē, e pūtakea mai ai te tanetane me te ruaki. Ko te mutunga iho pea ko te tūkino pūkahukahu, me te whakamutu pea i te mahi hēhē a te pēpi. Ko ngā piripoho ngā mea e tino mōrearea ana.

Parenga tāpiri

Tērā pea ka whakaratohia ētahi whakatō kano ārai mate tāpiri ki ētahi pēpi mēnā he nui ake te tūponotanga ka pāngia rātou e te tahumaero.

Mā tō tākuta whānau, tapuhi rānei ēnei e matapaki ki a koe.

Ngā ohonga tinana

E kite nuitia ana i ngā piripoho me ngā kōhungahunga ngā ohonga tinana āhua iti i muri i te whakatō kano ārai mate. E 2 rā pea te roanga o aua ohonga tinana. Ka whai wāhi pea ki ēnei:

  • te kiriweti (te ngenge me te tangitangi)
  • te kirikā ngāwari
  • tētahi tipu iti i te wāhi o te werohanga.

Ka pāngia pea ētahi pēpi e te ruaki me te kōrere āhua ngāwari tae atu ki tētahi wiki i muri i te whiwhinga ki te rongoā kano ārai mate mō te huaketo puku.

Me aha koe ki te pāngia tō tamaiti e te ohonga tinana?

  • Kaua e mirimiri i te wāhi o te werohanga kei kino haere ake te ohonga tinana.
  • Whakangorua ngā kākahu o tō tamaiti mēnā ka wera ia.
  • Whakaratohia tō tāmaiti ki ngā inu tāpiri (hei tauira, te wai, ētahi whāinuinu anō rānei).
  • Kaua e whāngai i te paracetamol, te ibuprofen rānei ki tō tamaiti, engari rawa ka tono tō tapuhi, tākuta rānei kia pēnā.

Mēnā kei te āwangawanga koe ki te ohonga tinana o tō tamaiti ko te whakatō kano ārai mate te pūtake, kōrero ki tō tākuta, tapuhi rānei, ka waea rānei ki te ratonga Healthline koreutu i 0800 611 116, ahakoa i te rā, i te pō rānei.

Te Rēhita Whakatō Kano Ārai Mate ā-Motu (NIR)

Kei te puritia e te NIR ngā kōrero whakatō kano ārai mate mō ngā tamariki katoa o Aotearoa.

Ka tuhia e tō tākuta, tapuhi rānei ia whakatō kano ārai mate o tō tamaiti ki te NIR.

Ko tā tēnei he whakarite kia whiwhi tō tamaiti i te whakatō kano ārai mate tika i te wā tika. Ka tukuna he pānui whakamaumahara ki a koe i mua i te wā whakarite mō ia whakatō kano ārai mate.

Mā tō kaiwhakawhānau, tākuta rānei e hoatu mōhiohio anō ki a koe i mua i te whānautanga o tō pēpi, i te wā anō hoki e matapaki ai kōrua i ngā whakatō kano ārai mate.

He aha kei runga i te NIR?

Ka tuhia ki te NIR ēnei taipitopito mō tō tamaiti:

  • tōna ingoa, wāhi noho, rā whānau, ira tangata me te matawaka
  • tōna tau hauora ahurei (Rārangi Hauora ā-Motu, NHI rānei)
  • tōna tākuta whānau, tapuhi me tōna kaiwhakarato Tamariki Ora
  • tōna poari hauora ā-rohe (DHB)
  • ōna whakatō kano ārai mate
  • ō kōrero whakapā.

Ka tuhia anō hoki ki te NIR mēnā kua whakatau koe kia kaua e tukuna tō tamaiti kia whiwhi rongoā ārai mate.

Ko wai mā e āhei te kite he aha kei te NIR?

Ka āhei ngā kaiwhakarato tiaki hauora anake te kite i ngā kōrero mō tō tamaiti i te NIR.

Kei reira aua mōhiohio hei whakarite kia whiwhi tō tamaiti i ngā whakatō kano ārai mate koreutu e āhei atu ai ia.

Ka taea tētahi kape o ngā mōhiohio kei runga i te NIR mō tō tamaiti te tono i tō tākuta whānau, tapuhi rānei i ngā wā katoa.

Te kōwhiri kia kaua e tuhia ngā kōrero whakatō kano ārai mate o tō tamaiti ki te NIR.

Mēnā kāore koe e pīrangi kia tuhia ngā kōrero whakatō kano ārai mate o tō tamaiti ki te NIR, ka taea tētahi puka ‘whakaputa atu’ te whakaoti. Tonoa he puka i tētahi tākuta, tapuhi rānei.

Ka āhei tonu tō tamaiti te whiwhi whakatō kano ārai mate koreutu tae noa kia 18 ana tau, ahakoa kua whakatau koe kia kaua e tuhia ana kōrero whakatō kano ārai mate ki te NIR. Ka pupuri tonutia e te NIR te ingoa, rā whānau, tau NHI me te poari hauora ā-rohe o tō tamaiti.

Mō ētahi anō mōhiohio mō te whakatō kano ārai mate

  • Kōrero ki tō tākuta whānau, tapuhi rānei.
  • Pānuitia te wāhanga mō ngā whakatō kano ārai mate i tō Well Child Tamariki Ora My Health Book.
  • Waeahia Healthline i te ao, i te pō ki 0800 611 116 me waea rānei ki 0800 IMMUNE (466 863) 9.00 i te ata ki te 4.30 i te ahiahi Rāhina-Rāmere.
  • Toroa te whārangi tukutuku whakatō kano ārai mate a Te Manatū Hauora i: www.health.govt.nz/immunisation

Code: HE1531