Teuteu‘i ho’o fānaú ke nau mo‘ui lelei ‘i he kaha‘ú.

Huhu malu‘i kinautolu.

Ko e ngaahi huhu malu‘i kotoa pē ‘i he Taimi Tēpile Huhu Malu‘i Fakafonuá ‘oku TA‘ETOTONGI ki he fānau si‘i hifo ‘i he 18.

‘Oku ‘ikai mahu‘inga ia pe ko e hā ‘enau visá pe tu‘unga tangata‘i fonuá. ‘Oku kau ki heni ‘a e kau folau ‘eve’eva mai ki Aotearoa Nu’u Silá.

Ko hono huhu malu‘i ho fānaú

‘Oku fakahaofi ‘e he huhu malu‘í ‘a e ngaahi mo‘uí. Ko hono huhu malu‘i ho fānaú ko e taha ia ‘o e ngaahi founga lelei taha ke malu‘i ‘aki kinautolu mo kamata‘i ‘enau mo‘ui lelei ki he kaha‘ú. ‘Oku ako‘i ‘e he huhu malu‘í ki he sino ho tamá, ‘a e founga ke nau tau‘i ‘aki ‘a e ngaahi mahakí mo holoki ‘a e tu‘u laveangofua ki ha mahaki ‘e malava ke mate ai. ‘Oku malu‘i foki ‘e hono huhu malu‘i ho tamá ‘a e kakai tu‘u laveangofua ‘i ho fāmilí mo e koló ‘a ia ‘oku ‘ikai malava ke huhu malu‘i kinautolú.

Ko e taimi ke huhu malu‘i aí

‘Oku kamata ‘a e huhu malu‘i ho tamá kimu‘a ‘i hono fā‘ele‘í. Ko e taimi ‘okú ke feitama aí, ‘oku ta‘etotongi hono huhu malu‘i koe mei he ngaahi mahaki te ne ala uesia koe mo ho‘o pēpeé. Ko hono fā‘ele‘i pē ho‘o pēpeé, ‘e lava leva ke huhu malu‘i ma‘u pē kinautolu mei ha ngaahi mahaki ‘oku malava ke nau faka‘ehi‘ehi mei ai, kau ai e tale lōloá, huhunú mo e mīselé.

‘Oku fakahoko atu ‘a e ngaahi huhu malu‘i ko ‘ení ‘i ha ngaahi taimi pau ‘i he mo‘ui kotoa ho tamá ke ‘oange kiate kinautolu ‘a e malu‘i lelei taha ‘e ala lavá. Ko e ngaahi huhu malu‘i ‘oku poupou‘i ma‘á e fānaú kotoa mo hono ngaahi taimí ‘oku ‘i he Taimi Tēpile Huhu Malu‘i Fakafonuá. ‘Oku hangē ‘eni ha taimi tēpile ‘oku ‘asi ai ‘a e taimi ke fakahoko ai ‘a e huhu malu‘i takitaha. Te ke lava ‘o fokotu‘u ha taimi tēpile huhu malu‘i fakafo‘ituitui ma‘a ho fānaú ‘a ia ‘oku ‘asi ai ‘a e huhu malu‘i ‘oku nau fiema‘u mei he uike 6 ki he ta‘u 13, pea mo e taimi ‘oku ‘osi ki aí.

Ki he malu‘i lelei tahá, ‘oku fiema‘u ‘e ho‘o fānaú ‘a e kotoa ‘o ‘enau ngaahi huhu malu‘í.

‘Oku mahu‘inga ke ma‘u kotoa ‘e ho’o tamá ‘enau ngaahi huhu malu‘í, ‘i he taimi ‘oku fokotu‘u atú. Ko e ‘ikai ko ia ke huhu malu‘i kinautolu ‘i he taimi totonú, ‘e ala tu‘u laveangofua ai ho‘o fānaú ke nau mo‘ua ‘i ha mahaki fakatu‘utāmaki.

Kapau ‘oku ‘ikai ke ke fakapapau‘i pe kuo ‘osi huhu malu‘i, pe fuoloa ‘a e taimi ke fakahoko ia ki ho‘o fānaú, pe ‘atā ki ai, talanoa ki he‘enau toketaá, neesí pe kautaha ngāue ki he mo‘ui leleí. Te ke lava foki ‘o vakai‘i ‘enau Well Child Tamariki Ora Health Book.

Kapau na‘e ‘ikai fakahoko ki ho‘o tamá ha huhu malu‘i, ‘oku SAI pē. ‘E malava ke fakakakato e lahi taha ‘o e huhu malu‘i ho‘o fānaú.

Ko e ngaahi uesia tamaki ‘e ala hokó mo e ngaahi faka‘ilongá (reactions)

‘I ho‘o hoko ko ha mātu‘a pe tokotaha tauhi, te ke ala ongo‘i hoha‘a ki he me‘a ‘e hoko ki ho‘o tamá hili ‘a e huhu malu‘í pea mo ha ngahi uesia tamaki ‘e ala hoko. ‘Oku angamaheni pē ke ongo‘i pehē. Kae ‘oua na‘á ke hoha‘a, ko e ngaahi uesia tamakí ‘oku fa‘a vaivai ‘aupito pea ‘ikai fuoloa, pea ‘oku ‘ikai ke a‘usia ‘e he Fānau kotoa pē. Ko e me‘a angamaheni ‘oku fa‘a ongo‘i ‘i ha huhu malu‘i ko ha ki‘i mofi pe felangaaki pe fufula ‘i he feitu‘u na‘e huhu aí.

Ko e ngaahi huhu malu‘i kotoa pē ‘oku ma‘u atu ‘i Nu‘usila, kuo ‘osi sivi faka‘auliliki ia ki he‘ene tu‘unga malú mo ‘aongá.

Feitu‘u ke huhu malu‘i ai ho fānaú

Ke puka ha ‘apoinimeni huhu malu‘i fetu‘utaki ki he toketā, neesi, pe kautaha ngāue ki he mo‘ui lelei ‘a ho‘o tamá. ‘Oku ma‘u atu foki mo ha ngaahi huhu malu‘i ‘e ni‘ihi ‘i he ngaahi kilīnikí, polokalama fakaakó, kautaha Mauli mo e Pasifiki ‘oku nau ngāue ki he mo‘ui lelei 
pea mo e ngaahi feitu‘u ‘oku fakahoko ai ha polokalama huhu malu‘i. ‘E lava ke puka ‘i he ‘initanetí ha huhu malu‘i COVID-19, ‘i he BookMyVaccine.nz

Ngaahi huhu malu‘i kehe

Ko e ngaahi huhu malu‘i kehe ‘oku ‘ikai ke lolotonga ‘asi ‘i he taimi tēpilé, ‘e malava ke poupou‘i ke ma‘u atu kapau ‘oku pehē ko ho‘o tamá ‘oku ‘tu‘u laveangofua “aupito” pe ‘okú ke folau ki tu‘apule‘anga.

Fehu‘i ki ho‘o toketaá, neesí, pe kautaha ngāue ki he mo‘ui leleí pe ko e hā ha ngaahi huhu malu‘i kehe ‘e ala fiema‘u ke tānaki atu ma‘a ho‘o fānaú.

Huhu malu‘i ‘i hono fakamā‘opo‘opó 

• ‘Oku malu‘i ‘e he huhu malu‘í ‘a e fānaú mei ha ngaahi mahaki lalahi ‘e 15 ‘oku ala faka‘ehi‘ehi mei ai.
• ‘Oku kamata ‘a e huhu malu‘i ‘o ho‘o tamá kimu‘a ‘i hono fā‘ele‘í. Ko e taimi ‘okú ke feitama aí, ‘oku ta‘etotongi hono huhu malu‘i koe mei he ngaahi mahaki te ne ala uesia koe mo ho‘o pēpeé.
• Ko e ngaahi huhu malu‘i ‘i he Taimi Tēpile ‘o e Huhu Malu‘i Fakafonuá ‘oku ta‘etotongi ia ki he fānaú kotoa si‘i hifo ‘i he ta‘u 18.
• Ke ma‘u ‘a e malu‘i lelei tahá, ‘oku totonu ke fakahoko ‘a e huhu malu‘i ‘o e fānaú ‘i hono taimi totonú, kapau ‘e ‘ikai lava ia, ‘oku sai pē, te nau kei lava pē ‘o toki fakakakato.
• Ko e fanga ki‘i pēpē mo e fānau ‘e ni‘ihi ‘oku tu‘u laveangofua lahi ange ke ma‘u ‘e ha mahakí, ‘e malava pē ke fakalahi atu ‘enau huhu malu‘í.

Ki ha fakamatala lahi ange fekau‘aki mo hono malu‘i ho‘o Fānaú ‘o ngāue‘aki ‘a e huhu malu‘í

• talanoa ki ho‘o toketaá, neesí pe kautaha ngāue ki he mo‘ui leleí
• telefoni ki he Laine Mo‘ui Leleí (Healthline) ‘i he 0800 611 116
• ‘a‘ahi ki he info.health.nz